ಪುಸ್ತಕದೊಳಗೆ - ೫

( ಬರಹ; ರಂಜಿತ್ ಅಡಿಗ.)


ಹೆಸರು : ಖುಷಿಯಿಂದ ರಮೇಶ್
ಲೇಖಕರು : ರಮೇಶ್ ಅರವಿಂದ್ (ನಿರೂಪಣೆ : ಚೇತನ್ ನಾಡಿಗೇರ್)
ಪ್ರಕಾಶಕರು : ಸ್ಪೂರ್ತಿ, ಕಡಲು ಪ್ರಕಾಶನ, ನಂ. ೬೦೧, ೩ನೇ ಹಂತ, ೩ನೇ ಬ್ಲಾಕ್, ಬಸವೇಶ್ವರನಗರ, ಬೆಂಗಳೂರು – ೭೯.
ಮೊದಲ ಮುದ್ರಣ : ೨೦೧೩
ಬೆಲೆ : ರೂ.೨೫೦.

ಪುಸ್ತಕದ ಬಗ್ಗೆ : ಈಗಾಗಲೇ ನಟನೆಯಲ್ಲಿ ಮೂರು ದಶಕಗಳ ಕಾಲ, ಐದು ಭಾಷೆಗಳ ಸಿನಿಮಾರಂಗದಲ್ಲಿ ಗುರುತಿಸಿಕೊಂಡು, ಈಗಲೂ ತಮ್ಮ ಉತ್ತಮ ನಟನೆಯಿಂದ ಹೆಸರುವಾಸಿಯಾದ, ತಮ್ಮ ಕ್ರಿಯಾಶೀಲತೆಯ ವ್ಯಾಪ್ತಿಯನ್ನು, ನಟನೆ, ನಿರ್ದೇಶನ, ನಿರೂಪಣೆ, ಕಥೆಗಾರರಾಗಿ ವಿಸ್ತರಿಸಿಕೊಳ್ಳುತ್ತಿರುವ ಸೃಜನಾತ್ಮಕ ಪ್ರತಿಭೆ ರಮೇಶ್ ಅರವಿಂದ್. ನಟನೆಯ ಜೊತೆಗೆ ತಮ್ಮ ಸರಳತೆ, ಸಜ್ಜನಿಕತೆಗೂ ಪ್ರಸಿದ್ದರು. ಇನ್ನೊಂದು ಮಾತಲ್ಲಿ ಹೇಳಬೇಕೆಂದರೆ ಚಿತ್ರರಂಗದ ಅಜಾತಶತ್ರು. ಓದುವಿಕೆ ಎನ್ನುವ ಉತ್ತಮ ಹವ್ಯಾಸವುಳ್ಳ ರಮೇಶ್ ಅರವಿಂದ್ ಗೆ ವ್ಯಕ್ತಿತ್ವ ವಿಕಸನ ಪುಸ್ತಕದ ಓದಿನಲ್ಲಿ ಹೆಚ್ಚು ಆಸಕ್ತಿ. ಅವರ ಜೀವನಾನುಭವದಲ್ಲಿ ಜೀವನಸ್ಫೂರ್ತಿಯುಳ್ಳ ವಿಚಾರಗಳ ಬಗ್ಗೆ ರೂಪತಾರಾ ಮಾಸಿಕದಲ್ಲಿ ಬರೆಯುತ್ತಿದ್ದುದು ಈಗ ’ಖುಷಿಯಿಂದ ರಮೇಶ್’ ಪುಸ್ತಕವಾಗಿ ಪ್ರಕಟಗೊಳ್ಳುತ್ತಿದೆ.
ರಮೇಶ್ ಒಬ್ಬ ನಟರಾಗಿ ನಿರ್ದೇಶಕರಾಗಿ ವಿವಿಧ ಸ್ಥಳಗಳಿಗೆ ಹೋಗಬೇಕಾಗುತ್ತದೆ. ಬೇರೆ ಬೇರೆ ರೀತಿಯ ವ್ಯಕ್ತಿಗಳೊಡನೆ ವ್ಯವಹರಿಸಬೇಕಾಗುತ್ತದೆ. ಅವರ ಜೀವನಾನುಭವದ ಆಳ ವಿಸ್ತಾರ ಈ ನಿಟ್ಟಿನಲ್ಲಿ ದೊಡ್ಡದು. ಅವರ ಬಾಳ ಹರಿವಿನಲ್ಲಿ ಜೀವನೋತ್ಸಾಹ ಉಕ್ಕಿಸುವ ಅನೇಕ ವಿಚಾರಗಳನ್ನು ಇಲ್ಲಿ ಹಂಚಿಕೊಂಡಿದ್ದಾರೆ. ಮಸ್ಕತ್ ಬಳಿ ಇರುವ ಸುರ್ ಬೀಚ್ ನ ಆಮೆಗಳ ವಿಷಯವನ್ನು ನಮ್ಮ ಬಾಳಿನ ಉತ್ಸಾಹಕ್ಕೆ ಉದಾಹರಣೆಯಾಗಿ ಕೊಟ್ಟಿದ್ದು, ಮಕ್ಕಳಿಗೆ ನೇತ್ರದಾನ ವಿಷಯವನ್ನು ಅದ್ಭುತವಾಗಿ ಡಾ ರಾಜ್ ಉದಾಹರಣೆಯಾಗಿ ವಿವರಿಸಿದ್ದು, ಬಾತುಕೋಳಿ ಈಜು, ಕುಂಗ್ಫು ಪಾಂಡಾ ಸಿನಿಮಾ, ಚೈನೀಸ್ ಭಾಷೆಯ ವೈಜಿ ಅನ್ನುವ ಪದ, ಇವೆಲ್ಲವನ್ನೂ ಸ್ಫೂರ್ತಿಗೊಳ್ಳಬೇಕಾದ ವಿಚಾರವನ್ನಾಗಿ ಹೇಳುವುದು ಈ ಪುಸ್ತಕದ ಹೆಗ್ಗಳಿಕೆ. ಟ್ರಾಫಿಕ್ ಜಾಮ್ ಒಂದರಿಂದ ಪ್ರೆಸ್ ಮೀಟ್ ಗೆ ತಡ ಆಗಿದ್ದನ್ನು, ನಮ್ಮ ಬಾಳಿನ ಗುರಿಗೆ ಅಡ್ಡಿಯಾಗಿಸಬಹುದಾದ ವಿಚಾರಗಳನ್ನು ಆಲೋಚಿಸುವಂತೆ ಪ್ರೇರೇಪಿಸುವ ಬರಹಗಳಿವೆ ಈ ಹೊತ್ತಗೆಯಲಿ.
ಚಿಕ್ಕ ವಿಷಯದಲ್ಲೂ ಬದುಕನ್ನು ನೋಡುವ, ಅದನ್ನೇ ಅನ್ವಯಿಸಿಕೊಂಡು ಬಾಳ್ವೆಯನ್ನು ಬೆಳಕಾಗಿಸುವ ಪ್ರಯತ್ನವೇ ಪುಸ್ತಕ. ಈ ನಿಟ್ಟಿನಲ್ಲಿ ರಮೇಶ್ ಅವರ ಅಬ್ಸರ್ವೇಶನ್ ಶಕ್ತಿಗೆ ಮೆಚ್ಚಿಕೊಳ್ಳಲೇಬೇಕು.
ಜೊತೆಗೆ ರಮೇಶ್ ಸಿನಿರಂಗದ ಮಜಲುಗಳನ್ನು ಪರಿಚಯಿಸುವ ಒಳ್ಳೊಳ್ಳೆ ಫೋಟೋಗಳಿವೆ. ಒಂದು ಫೋಟೋದಲ್ಲಿ ದಕ್ಷಿಣ ಭಾರತದ ದಿಗ್ಗಜ ಕಲಾವಿದರೆಲ್ಲಾ (ವಿಕ್ಟರಿ ವೆಂಕಟೇಶ್,ಅಂಬರೀಶ್, ಸುಮಲತಾ, ರವಿಚಂದ್ರನ್,ಅರ್ಜುನ್ ಸರ್ಜಾ, ಶರತ್ ಕುಮಾರ್, ರಮ್ಯಕೃಷ್ಣ, ಸರಿತಾ, ನಂದಮೂರಿ ಬಾಲಕೃಷ್ಣ, ಮೋಹನ್ ಲಾಲ್, ಸುಹಾಸಿನಿ) ಫೋಟೋ ಒಂದಕ್ಕೆ ಪೋಸು ನೀಡಿದ್ದ ಅಮೂಲ್ಯ ಚಿತ್ರವೂ ಇರುವುದು ವಿಶೇಷ.
ಕೊನೆನುಡಿ : ಪುಸ್ತಕಕ್ಕೆ ಇನ್ನೂರೈವತ್ತು ಹೆಚ್ಚಾಯಿತೆನಿಸಿದರೂ, ಪುಸ್ತಕದೊಳಗಿನ ವಿಚಾರಧಾರೆ ಮತ್ತು ಫೋಟೋಗಳ ಜೊತೆಗೆ, ಬೈಂಡಿಂಗ್ ಮತ್ತು ಪುಟದ ಗುಣಮಟ್ಟ ಚೆನ್ನಾಗಿರುವುದರಿಂದ ಕೊಂಡುಕೊಳ್ಳಬಹುದು. ಪುಟ ವಿನ್ಯಾಸದಲ್ಲಿ ಉಲ್ಟಾ ಆಗಿ ಪ್ರಿಂಟಿಸಿರುವುದು, ಬದಿಯಾಗಿ ಓದಬೇಕಾಗುವಂತೆ ಮಾಡಿರುವುದು ಕೊಂಚ ಅಡ್ಡಿಯೆನಿಸಿದರೂ ಸೃಜನಾತ್ಮಕತೆಯ ಪ್ರಯತ್ನವಾಗಿ ಮೆಚ್ಚಿಕೊಳ್ಳಬೇಕು

ಪುಸ್ತಕದೊಳಗೆ - ೭

( ಬರಹ; ರಂಜಿತ್ ಅಡಿಗ.)

ಹೆಸರು : ಸಿನಿಮಾ, ಒಂದು ಜಾನಪದ ಕಲೆ
ಲೇಖಕರು : ಬರಗೂರು ರಾಮಚಂದ್ರಪ್ಪ
ಪ್ರಕಾಶಕರು : ಅಂಕಿತ ಪುಸ್ತಕ, ೫೩, ಶ್ಯಾಮ್ ಸಿಂಗ್ ಕಾಂಪ್ಲೆಕ್ಸ್, ಗಾಂಧಿ ಬಜಾರ್ ಮುಖ್ಯರಸ್ತೆ, ಬಸವನಗುಡಿ, ಬೆಂಗಳೂರು -೪
ಮೊದಲ ಮುದ್ರಣ : ೨೦೦೭
ಬೆಲೆ : ೧೨೦

ಪುಸ್ತಕದ ಬಗ್ಗೆ : ಬರಗೂರರು ಹಗಲು ವೇಷ, ಶಾಂತಿ, ತಾಯಿ ಮುಂತಾದ ಚಿತ್ರಗಳನ್ನು ನಿರ್ದೇಶಿಸಿದ್ದಾರೆ. ಬಂಡಾಯ ಸಾಹಿತ್ಯದಲ್ಲಿ ಹೆಸರು ಮಾಡಿದ ಲೇಖಕರಲ್ಲಿ ಮೇಲ್ಪಂಕ್ತಿಯಲ್ಲಿರುವವರು. ಒಂದು ಊರಿನ ಕಥೆಗಳು, ಕಾಂಟೆಸ್ಸಾ ಕಾವ್ಯ, ನೆತ್ತರಲ್ಲಿ ನೆಂದ ಹೂ ಮುಂತಾದ ಕೃತಿಗಳನ್ನು ನೀಡಿದ್ದಾರೆ. ಸಿನಿಮಾ ರಂಗದ ಬಗ್ಗೆ ವಿವಿಧ ಕಾಲಘಟ್ಟದಲ್ಲಿ, ಬೇರೆ ಬೇರೆ ಪತ್ರಿಕೆಗಳಲ್ಲಿ ಬಂದ ಬರಗೂರು ರಾಮಚಂದ್ರಪ್ಪರವರ ಲೇಖನಗಳ ಸಂಗ್ರಹಬುಟ್ಟಿ ಈ ಪುಸ್ತಕ.
ಈ ಪುಸ್ತಕವನ್ನು ಬರಗೂರರು ಎರಡು ವಿಭಾಗವನ್ನಾಗಿ ಮಾಡಿದ್ದಾರೆ. ಮೊದಲ ವಿಭಾಗದಲ್ಲಿ ಸಿನಿಮಾವನ್ನು ಒಂದು ಜನಪದ ಕಲೆಯಾಗಿ ನೋಡುವ ಪ್ರಯತ್ನವಿದೆ. ಸಿನಿಮಾರಂಗವನ್ನು ಕಲೆ ಮಾತ್ರವಲ್ಲದೇ, ಒಂದು ಉದ್ಯಮವಾಗಿ ಮಾತ್ರ ಅಲ್ಲದೇ ಒಟ್ಟಾರೆ ಕಲೋದ್ಯಮವೆಂದು ನೋಡುವ ಬಗೆಯೂ ಇದೆ. ಸಿನಿಮಾದಲ್ಲಿ ಜಾತಿ ಮತ್ತು ವರ್ಗ, ಸಮೂಹ ಮಾಧ್ಯಮ ಸಂಸ್ಕೃತಿ ಮತ್ತು ಮಹಿಳೆ, ಭಾಷೆ ತಂತ್ರಜ್ಞಾನ ಮತ್ತು ಸಿನಿಮಾ, ದೂರದರ್ಶನ ಸಂಸ್ಕೃತಿ ಮುಂತಾದ ಲೇಖನಗಳ ಶೀರ್ಷಿಕೆಗಳೇ ಲೇಖನದ ಸಾರವನ್ನು ಬಿಚ್ಚಿಡುತ್ತದೆ. ಬರಗೂರರು ತಾವೂ ಸಿನಿಮಾ ನಿರ್ಮಾಪಕ ನಿರ್ದೇಶಕರಾದ್ದರಿಂದ ಮತ್ತು ಸಾಹಿತ್ಯದಲ್ಲೂ ತಮ್ಮ ಹೆಸರನ್ನು ಛಾಪಿಸಿದವರಾದ್ದರಿಂದ ಅವರ ದೃಷ್ಟಿಕೋನ ಸಿನಿಮಾವನ್ನು ಅಭ್ಯಸಿಸುವವರಿಗೆ ಒಂದೊಳ್ಳೆ ಮಾಪನವನ್ನು, ಹೊಸದೊಂದು ಪಾಯಿಂಟ್ ಆಫ್ ವ್ಯೂ ಕೊಡಬಹುದು. ಇನ್ನೊಂದು ಭಾಗದಲ್ಲಿ ರಾಜ್ಯ ಪ್ರಶಸ್ತಿಯ ಮಾನದಂಡವನ್ನು ಪ್ರಶ್ನಿಸುವ, ಅಲ್ಲಿ ಸೂಕ್ತ ನ್ಯಾಯ ಬಯಸುವ ಪ್ರಯತ್ನದ ಕುರಿತ ಲೇಖನವಿದೆ. ಪ್ರಶಸ್ತಿಯ ಬಗ್ಗೆ ಪ್ರಶ್ನಿಸುವ ವಿಚಾರದಲ್ಲಿ ತಾವು ಕೋರ್ಟಿಗೆ ಹೋದ ಬಗ್ಗೆಯಲ್ಲಿ ಸ್ವಂತಹಿತವಿಲ್ಲದಿರುವುದರ ಬಗೆಯ ಪ್ರಸ್ತಾಪವಿದೆ. ಒಂದು ಲೇಖನದಲ್ಲಿ ಡಾ ರಾಜ್ ವ್ಯಕ್ತಿತ್ವದ ಕುರಿತು ಚಂದದ ಬರಹವಿದೆ.
ಜೊತೆಗೆ ಚಿತ್ರಯಶಸ್ಸಿಗೆ ಬೇಕಾದ ಮೂಲದ್ರವ್ಯವೇನು, ಹೊಸ ರೀತಿ ಚಿತ್ರಗಳ ವಿತರಣೆಗೆ ಹೊಸ ವ್ಯವಸ್ಥೆ, ನನ್ನ ಸೂತ್ರಗಳನ್ನು ನಾನೇ ಮೀರುವ ಪ್ರಯತ್ನ, ಕಲಾತ್ಮಕ ಚಿತ್ರ ಕೂಡ ಕಮರ್ಷಿಯಲ್ ಚಿತ್ರ ಎಂಬ ಲೇಖನಗಳಿವೆ.
ಕೊನೆನುಡಿ : ಪುಸ್ತಕದ ಕೊನೆಯಲ್ಲಿ ತಮ್ಮ ಸಂದರ್ಶನಗಳನ್ನು ಪ್ರಕಟಿಸಿರುವುದು ಮತ್ತು ಲೇಖನಗಳ ಕೊನೆಯ ಭಾಗಗಳಲ್ಲಿ ತಮ್ಮ ಚಿತ್ರಗಳ ಕುರಿತು ಹೆಚ್ಚು ಬರೆದುಕೊಂಡಿರುವುದು ಓದುವಾಗ ಓದುಗನ ಚಿಂತನೆಗೆ ಅಡ್ಡಿ ಪಡಿಸಿರುವ ಸಂಗತಿಯಾಗಿದೆ. ಶೀರ್ಷಿಕೆ ಓದಿದ ಓದುಗ ಸಿನಿಮಾ ಎಂಬ ಕಲೆ ಅಥವಾ ಕಲೋದ್ಯಮದ ಬಗ್ಗೆ ಒಂದು ಜನರಲ್ ಆಗಿರುವ ಲೇಖನಗುಚ್ಚದ ನಿರೀಕ್ಷೆ ಇಟ್ಟಿರುತ್ತಾನೆ. ಪುಸ್ತಕದ ಎಂಭತ್ತು ಪ್ರತಿಶತ ಭಾಗದಲ್ಲಿ ಅದು ದೊರಕಿದರೂ ಮಿಕ್ಕುಳಿದ ಭಾಗದಲ್ಲಿ ನಿರಾಸೆಯಾಗುತ್ತದೆ. ಸಿನಿಮಾ ಕಲಾಸಕ್ತರು ಒಮ್ಮೆ ಓದಿ ನೋಡಬಹುದಾದ ಪುಸ್ತಕವಿದು.

ಪುಸ್ತಕದೊಳಗೆ - ೬

"ಯುಗಾಂತ"

ಲೇಖಕಿ; ಇರಾವತಿ ಕರ್ವೆ,
ಪ್ರಕಾಶಕರು; ಕೇಂದ್ರ ಸಾಹಿತ್ಯ ಅಕಾಡಮಿ ( ಒಂದು ಬಾರಿ.)
ಓರಿಯಂಟಲ್ ಲಾಂಗ್'ಮೆನ್ ( ಒಂದು ಬಾರಿ.)
ಅಭಿನವ ( ಎರಡು ಬಾರಿ.),
ಪ್ರಕಟಣೆ; ೧೯೬೬,
ಕ್ರಯ; ರೂಪಾಯಿ ೧೫೦.

" ಇವತ್ತು ಎಲ್ಲರೂ ಹಿಮಾಲಯದ ಬುಡವನ್ನು ಬಿಟ್ಟು ಪರ್ವತ ಏರಲು ಪ್ರಾರಂಭಿಸಿದರು. ಕೆಳ ಭಾಗದ ಕುಟೀರಗಳಲ್ಲಿ ಅವರನ್ನು ಕಾಯುವ ಕೆಲಸದಾಳುಗಳು, ಸೇವಕರು ಇದ್ದರು. ಹತ್ತಿರದಲ್ಲಿಯೆ ಋಷಿ ಕುಟೀರಗಳು. ಧರ್ಮ ಮತ್ತವನ ತಮ್ಮಂದಿರು ಅವರನ್ನ ನೋಡಲಿಕ್ಕೆ ಎರಡು ಸಲ ಬಂದು ಹೋಗಿದ್ದರು. ಏರಿಳಿತವಿಲ್ಲದ ಶಾಂತಮಯ ಬಾಳು ಅಲ್ಲಿ ಅವರದ್ದಾಗಿತ್ತು. ಧೃತರಾಷ್ಟ್ರ, ಗಾಂಧಾರಿ, ವಿದುರ, ಕುಂತಿಯರಿಗೆ ಒಂದೊಂದಾಗಿ ದಿನಗಳು ಕಳೆದು ಹೋಗುತ್ತಿದ್ದವು. ಋಷಿಗಳೊಂದಿಗೆ ವಿದುರ ಧೃತರಾಷ್ಟ್ರರು ಒಂದಿಲ್ಲೊಂದು ವಿಷಯಗಳ ಬಗ್ಗೆ ಚರ್ಚಿಸುತ್ತಾ ಕಾಲ ಕಳೆಯುತ್ತಿದ್ದರು. ಗಾಂಧಾರಿ ಹಾಗೂ ಕುಂತಿ ಅದನ್ನ ಕೇಳುತ್ತಾ ಮೌನವಾಗಿ ಕುಳಿತುಕೊಳ್ಳುವರು.ಅವರ ಬಾಳಿನ ಹೊರ ಮುಖದಲ್ಲಿ ಕಾಣುತ್ತಿದ್ದ ಈ ಶಾಂತ ಸ್ಥಿತಿಗೆ ಅವರನ್ನ ಹೊರಗಿನ ಜನರು ಕಾಣಲು ಬಂದಾಗಲೆಲ್ಲ ಭಂಗವಾಗುತ್ತಿತ್ತು. ಹಾಗೆ ಈಗ ರಾಜರಾಗಿರುವ ಕುಂತಿಯ ಮಕ್ಕಳು ಕಾಣಲು ಬಂದಾಗಲೆಲ್ಲ ಬರಿ ಕಲರವವೆ ಅಲ್ಲೆಲ್ಲ ತುಂಬಿಕೊಳ್ಳುತ್ತಿತ್ತು. ಹಿರಿಯರ ಪಾದದಡಿಯಲ್ಲಿ ಮಕ್ಕಳು ಬಂದು ತಮ್ಮ ತಲೆಯನ್ನಿರಿಸುವಾಗ ಅವರವರ ಭಾವಕ್ಕೆ ತಕ್ಕ ಏರಿಳಿತಗಳು ಅವರವರ ಹೃದಯದಲ್ಲಿ ಮೂಡುತ್ತಿತ್ತು. ಆದರೂ ಮೇಲ್ನೋಟಕ್ಕೆ, ಕೇವಲ ಬರಿ ತೋರಿಕೆಗೆ ಅವರೆಲ್ಲರೂ ಮಕ್ಕಳೆಲ್ಲ ಹೋದ ಮೇಲೆ ಶಾಂತ ಚಿತ್ತವನ್ನ ನಟಿಸುತ್ತಿದ್ದರು. ಆದರೆ ಮನದೊಳಗಿನ ಬೇಗುದಿಯನ್ನ ಸ್ಥಿಮಿತಕ್ಕೆ ತರಲು ಅವರೆಲ್ಲರಿಗೂ ತುಂಬಾ ಕಷ್ಟವಾಗುತ್ತಿತ್ತು.

ಇವತ್ತೂ ಸಹ ರಾಜಕುಮಾರರೆಲ್ಲ ತಮ್ಮ ತಮ್ಮ ರಾಣಿಯರೊಂದಿಗೆ ಹಸ್ತಿನಾಪುರದಿಂದ ಬಂದಿದ್ದಾರೆ. ಆಗ ಯಾವುದೋ ಒಂದು ವಿಚಾರದ ಬಗ್ಗೆ ದೃಢ ನಿರ್ಧಾರಕ್ಕೆ ಬಂದ ಧೃತರಾಷ್ಟ್ರ ಧರ್ಮರಾಜನೊಂದಿಗೆ ಹೀಗಂದ; "ಯುಧಿಷ್ಠಿರ ಇದು ನಿಜವಾಗಿಯೂ ಬಾಳಿನ ಕೊನೆಯ ಆಶ್ರಮವಲ್ಲ. ಈಗ ನಾವು ನಾಲ್ವರೂ ಒಂದು ಕುಟೀರವನ್ನ ಕಟ್ಟಿಕೊಂಡು ವಾಸಿಸಲು ಬಿಡು. ಅರಮನೆಯ ಸುಖದಲ್ಲಿ ಬಾಳಿದ ನಮಗೆ ಈ ಆರು ತಿಂಗಳಲ್ಲಿ ಕಾಡು ಅಭ್ಯಾಸವಾಗಿದೆ. ಇನ್ನೂ ಮೇಲಿನ ಅರಣ್ಯಕ್ಕೆ ನಮ್ಮನ್ನ ಸಾಗಲು ಬಿಡು. ಅದೆ ಒಳ್ಳೆಯದು ಅಂತನ್ನಿಸುತ್ತದೆ". ಹೀಗಂದ ಕ್ಷಣ ಧರ್ಮನೂ ಸೇರಿ ಉಳಿದೆಲ್ಲರೂ ಈ ಕಠಿಣ ನಿರ್ಧರವನ್ನ ಕೈ ಬಿಡುವಂತೆ ಅವರೆಲ್ಲರನ್ನೂ ಪರಿಪರಿಯಾಗಿ ಒತ್ತಾಯಿಸುತ್ತಾರೆ. ಆದರೆ ಅವರಿದಕ್ಕೆ ಕಿವಿಗೊಡುವುದಿಲ್ಲ. ಧರ್ಮ ವಿದುರನ ಮುಖ ನೋಡುತ್ತಾನೆ. ಆಗ ವಿದುರ "ಅವನು ಹೇಳುವುದು ಸರಿ ಎನ್ನಿಸುತ್ತದೆ, ಧರ್ಮಾ ನೀನೀಗ ನಮ್ಮನ್ನು ಬೀಳ್ಕೊಡಲೇ ಬೇಕು, ಧರ್ಮದ ಸಾರವನ್ನ ಚನ್ನಾಗಿ ಅರಿತ ನೀನೆ ಏಕೆ ಮತ್ತೆ ಪ್ರಾಪಂಚಿಕತೆಗೆ ನಮ್ಮನ್ನು ಎಳೆಸಲು ಹವಣಿಸುತ್ತಿದ್ದೀಯ? ಕಡೆಗೆ ನೀನೂ ಸಹ ನಮ್ಮ ಬೆನ್ನಿಗೆ ಅಂಟಿಕೊಂಡಿರಬಾರದು". ವಿದುರ ಹೀಗನ್ನುತ್ತಲೆ ಕುಂತಿಯ ಕಣ್ಣುಗಳು ತುಂಬಿ ಬಂದವು. ಅವಳೂ ಸಹ ಆ ಅಭಿಪ್ರಾಯಕ್ಕೆ ಸಹಮತವನ್ನ ಕಟ್ಟಿದ ಕಂಠದಲ್ಲಿಯೆ ವ್ಯಕ್ತಪಡಿಸಿದಳು. ಆದರೆ ಗಾಂಧಾರಿಯ ಅಭಿಪ್ರಾಯವನ್ನ ಯಾರೊಬ್ಬರೂ ಕೇಳಲೇ ಇಲ್ಲ! ಕುರುಡ ಗಂಡನ ಅಭಿಪ್ರಾಯವೆ ಅವಳದು ಎಂದು ಅವರಿಗವರೆ ಗ್ರಹಿಸಿಕೊಂಡು ಬಿಟ್ಟರು".

- ಇರಾವತಿ ಕರ್ವೆ.

ಪ್ರತಿಯೊಬ್ಬ ಭಾರತೀಯ ಗಂಭೀರ ಓದುಗನನ್ನ ಒಂದಿಲ್ಲೊಂದು ಬಾಳ ಘಟ್ಟದಲ್ಲಿ ಕಾಡುವ ಎರಡು ಕೃತಿಗಳು "ರಾಮಾಯಣ" ಹಾಗೂ "ಮಹಾಭಾರತ". ಮೊದಲನೆಯದು ಸಂಪೂರ್ಣ ರಮ್ಯ ಕಥನ, ಅತಿಮಾನುಷ ಶಕ್ತಿ ಹಾಗೂ ಚಮತ್ಕಾರಿ ವ್ಯಕ್ತಿ ವಿಷಯಗಳಿಂದ ತುಂಬಿ ಹೋಗಿ ನಂಬಲು ಅಸಂಗತವಾದ ಪುರಾಣದ ಕಗ್ಗವಾಗಿದ್ದರೆ, ಎರಡನೆಯದು ಅಪ್ಪಟ ಮಾನವ ಸಂವೇದನೆಗಳ, ಪೈಪೋಟಿ, ಮತ್ಸರ, ಹೋರಾಟ ಹಾಗೂ ಮೇಲಾಟಗಳ ಈ ಮಣ್ಣಿಗೆ ಅಂಟಿದ ಕಥೆ ಆಗಿದ್ದು. ಕಾಲಾಂತರದಲ್ಲಿ ಅದರ ಹಲವು ಪಾತ್ರಗಳನ್ನ ಅರೆತುಂಬಿದ ಮಡಿಕೆಯಂತಹ ಕೆಲವು ತಲೆಗಳು ದೈವತ್ವಕ್ಕೆ ಏರಿಸಿ ಅತಿಮಾನುಶ ಶಕ್ತಿಗಳ ಪ್ರಭಾವಳಿಯನ್ನ ಆ ಪಾತ್ರಗಳಿಗೆ ತೊಡಿಸಿದರೂ ಅದು ನಮ್ಮ ಇತಿಹಾಸದ ಒಂದು ಭಾಗವೆ ಅನ್ನಿಸುವಷ್ಟು ಅದರ ಕಥನ ಸಹಜವಾಗಿದೆ.

ಹೆಸರಾಂತ ಭಾರತೀಯ ಸಮಾಜ ಶಾಸ್ತ್ರಜ್ಞೆ ಶ್ರೀಮತಿ ಇರಾವತಿ ಕರ್ವೆ ಈ ಹುಸಿ ಪ್ರಭಾವಳಿಗಳನ್ನೆಲ್ಲ ಬದಿಗಿರಿಸಿ ಮಹಾಭಾರತದ ಒಂದೊಂದೆ ಮುಖ್ಯ ಪಾತ್ರಗಳನ್ನ ಸವಿವರವಾದ ವಿಮರ್ಶೆಗೆ ಒಳ ಪಡಿಸಿ ಅವುಗಳ ಮನೋ ವ್ಯಾಪಾರವನ್ನ ವಿಶ್ಲೇಷಣೆಗೆ ಒಡ್ಡಿ ಬರೆದ ತರ್ಕಬದ್ಧ ಪುಸ್ತಕವೆ "ಯುಗಾಂತ". ಮೂಲ ಮರಾಠಿ ಭಾಷೆಯಲ್ಲಿ ಅವರು ಬರೆದಿದ್ದ 'ಯುಗಾಂತ' ಅದಕ್ಕೆ ಕೇಂದ್ರ ಸಾಹಿತ್ಯ ಅಕಾಡಮಿ ಪ್ರಶಸ್ತಿ ೧೯೬೭ರಲ್ಲಿ ಬಂದ ನಂತರ ಮೊದಲು ಆಂಗ್ಲಕ್ಕೂ ಅನಂತರ ಸರಸ್ವತಿ ರಿಸಬೂಡಾರ ಅನುವಾದದ ಮೂಲಕ ಕನ್ನಡಕ್ಕೆ ಹಾಗೂ ಎಲ್ಲಾ ಪ್ರಮುಖ ಭಾರತೀಯ ಭಾಷೆಗಳಿಗೂ ಸಾಹಿತ್ಯ ಅಕಾಡಮಿಯ ಮೂಲಕ ಮುಟ್ಟಿತ್ತು. ಮುಂದೆ ಓರಿಯಂಟಲ್ ಲಾಂಗ್'ಮೆನ್ ಇದೆ ಕೃತಿಯನ್ನ ಹೆಚ್ ಎಸ್ ಶಿವಪ್ರಕಾಶರ ಅನುವಾದದ ಮೂಲಕ ಕನ್ನಡದಲ್ಲಿ ಪ್ರಕಟಿಸಿತ್ತು. ಆದರೆ ಅವೆರಡೂ ಅವೃತ್ತಿಗಳ ಪ್ರತಿಗಳು ಸದ್ಯ ಮಾರುಕಟ್ಟೆಯಲ್ಲಿ ಲಭ್ಯವಿಲ್ಲ.

ಇತ್ತೀಚೆಗೆ ಕಳೆದ ಇರಾವತಿ ಕರ್ವೆಯವರ ನೇರ ಶಿಷ್ಯರಾಗಿದ್ದ ಶ್ರೀಪತಿ ತಂತ್ರಿಯವರು ಅನುವಾದಿಸಿದ ಇದೆ ಕೃತಿಯನ್ನ ಅಭಿನವ ಪ್ರಕಾಶನ ಪ್ರಕಟಿಸಿದೆ. ಈ ಮೂರೂ ಆವೃತ್ತಿಗಳನ್ನ ಓದಿರುವ ನನಗೆ ವಯಕ್ತಿಕವಾಗಿ ಶಿವಪ್ರಕಾಶರ ಅನುವಾದ ಮೂಲಕ್ಕೆ ಹೆಚ್ಚು ನಿಷ್ಠವಾಗಿದೆ ಎಂದು ಅನ್ನಿಸುತ್ತದೆ. ಹಾಗಂತ ಇನ್ನುಳಿದ ಬಾಕಿ ಎರಡು ಪುಸ್ತಕಗಳು ಕಳಪೆ ಎಂದು ಅರ್ಥವಲ್ಲ. ಇದೆ ಕೃತಿಯಿಂದ ಪ್ರಭಾವಿತರಾದ ಅದೆಷ್ಟೋ ಲೇಖಕರು ಇದನ್ನ ಆಧರಿಸಿ ತಮ್ಮದೆ ಕಥೆ ಕಾದಂಬರಿಗಳನ್ನ ಬರೆದಿದ್ದಾರೆ. ಕನ್ನಡದ ಮಟ್ಟಿಗೆ ಹೇಳುವುದಾದರೆ ಡಾ ಎಸ್ ಎಲ್ ಭೈರಪ್ಪರ ಮೇರುಕೃತಿ "ಪರ್ವ" ಅದೆ ಸಾಲಿಗೆ ಸೇರುತ್ತದೆ. ಮಹಾಭಾರತದ ವಸ್ತುನಿಷ್ಠ ಅರಿವಿಗೆ "ಯುಗಾಂತ"ವೂ ಒಂದು ಸರಳ ದಾರಿ.

ಪುಸ್ತಕದೊಳಗೆ - ೪

"ಬೆಟ್ಟದ ಜೀವ"

ಲೇಖಕ; ಡಾ ಶಿವರಾಮ ಕಾರಂತ,
ಪ್ರಕಾಶಕರು; ಐಬಿಎಸ್,
ಪ್ರಕಟಣೆ; ೧೯೭೨,
ಕ್ರಯ; ರೂಪಾಯಿ ೮೦.

" ಗೋಪಾಲಯ್ಯನವರು 'ಕತ್ತಲಾಗುತ್ತಿದೆ, ನಾವು ಹೊರಡೋಣ' ಎಂದರು. ಹೊರಡುವ ಮೊದಲು 'ಸಾವಿತ್ರಿ ಬರುತ್ತಾಳೆಯೆ?' ಎಂದು ಕೇಳಿದರು. 'ಸಾವಿತ್ರಿ' ಎಂದ ಕ್ಷಣ ನಾರಾಯಣಯ್ಯನ ಐದು ವರ್ಷದ ಹೆಣ್ಣು ಮಗು, ಅವಳ ಪುಟ್ಟ ಅಣ್ಣ ಕೌಪೀನ ವೇಷಧಾರಿಗಳಾಗಿ ಹೊರಬಂದರು. 'ಅಜ್ಜ ನಮ್ಮನ್ನು ಬಿಟ್ಟು ಹೋಗುತ್ತಿದ್ದೆಯಲ್ಲವೆ?' ಎಂದಳು ಆಕೆ. 'ಹೊರಡುವವರಾಗಿದ್ದರೆ ಅಂಗಿ ಹಾಕಿಕೊಳ್ಳಲಿಲ್ಲ ಯಾಕೆ?' ಎಂದು ಕೇಳಿದರು ಅಜ್ಜ. ಆಗ ಮಕ್ಕಳ ತಾಯಿ 'ಹೊಸಬರನ್ನು ಕಂಡು ಅವು ಹೆದರಿಕೊಂಡು ಪಿಳಿಪಿಳಿ ನೋಡುತ್ತಾ ನಿಂತಿದ್ದವು, ತಾವಾಗಿ ಬರುತ್ತೇವೆ ಎನ್ನುವ ಧೈರ್ಯವಾಗಲಿಲ್ಲ' ಎಂದಳು.

ಅಷ್ಟರಲ್ಲಿ ಇಬ್ಬರು ಮಕ್ಕಳೂ ಒಳಕ್ಕೆ ಓಡಿಹೋಗಿ ಕ್ಷಣ ಮಾತ್ರದಲ್ಲಿ ಹೊರಗೆ ಬಂದರು. ಸಾವಿತ್ರಿ ತನ್ನ ನಡುವಿಗೆ ತುಣುಕು ಶೀರೆಯೊಂದನ್ನು ಬಿಗಿದುಕೊಂಡು ಬಂದಳು. ಅವಳ ಅಣ್ಣ ಸುಬ್ರಾಯನು ಒಂದು ಪಾದ್ರಿ ನಿಲುವಂಗಿಯನ್ನು ತೊಟ್ಟುಕೊಂಡು ಬಂದನು. ಹುಡುಗಿ ವಯ್ಯಾರ ಮಾಡುತ್ತಾ 'ನಡೆದು ಹೋಗುವುದಾದರೆ ನಾನು ಬರುವುದೇ ಇಲ್ಲ' ಎಂದಳು.'ಏತಕ್ಕೆ?' ಎಂದು ಕೇಳಿದರು ಅಜ್ಜ. 'ನನಗೆ ಮೊನ್ನೆ ಸುಮಾರು ದಿವಸದ ಮೊದಲು ಕಾಲಿಗೊಂದು ಮುಳ್ಳು ಚುಚ್ಚಿತ್ತು' ಎಂದಳು ಆಕೆ. 'ಅದು ಕಳೆದ ವರ್ಷ ಸುಬ್ರಮಣ್ಯ ಷಷ್ಠಿಯ ಸಮಯಕ್ಕೆ ಅಲ್ಲವೆ!' ಎಂದು ಕೇಳಿದರು ಅಜ್ಜ.

- ಡಾ ಶಿವರಾಮ ಕಾರಂತ.

ತಮ್ಮ ಅಸಾಧ್ಯ ವ್ಯಂಗ್ಯ ಹಾಗೂ ವಿಡಂಬನೆಗೆ ಹೆಸರುವಾಸಿಯಾದ ಶಿವರಾಮ ಕಾರಂತರು ಕಲಾ ಮಾಧ್ಯಮದಲ್ಲಿ ಆಡಿನಂತೆ ಬಾಳಿದವರು. ಕಲಾ ಪ್ರಕಾರಗಳಲ್ಲಿ ಬಹುತೇಕ ಅವರು ಬಾಯಿ ಹಾಕದ ಎಡೆಯೆ ಇರಲಿಕ್ಕಿಲ್ಲ. ಕಥೆ ಬರೆದರು, ಕಾದಂಬರಿ ಬರೆದರು, ಮಕ್ಕಳ ಸಾಹಿತ್ಯ ರಚಿಸಿದರು, ಸಿನೆಮಾ ನಿರ್ದೇಶಿಸಿದರು, ತಾವೆ ನಟಿಸಿದರು, ಕಾಲಿಗೆ ಸ್ವತಃ ಗೆಜ್ಜೆ ಕಟ್ಟಿಕೊಂಡು ಯಕ್ಷಗಾನದ ಬ್ಯಾಲೆ ಆಡಿದರು, ಕಾಲಿನಲ್ಲಿ ಚಕ್ರ ಮೊಳೆತವರಂತೆ ಊರೂರು ಅಲೆದು ಪ್ರವಾಸ ಸಾಹಿತ್ಯವನ್ನ ದಾಖಲಿಸಿದರು, ಮಕ್ಕಳಿಗಾಗಿ ಪ್ರಶ್ನೋತ್ತರದ ಅಂಕಣ ನಿಯಮಿತವಾಗಿ ಬರೆದರು, ಅಂತರ್ಜಾತಿ ವಿವಾಹ ಆದರು, ಮಾಡಿಸಿದರು ಕರೆದಲ್ಲಿ ಬಂದು ಭಿಡೆಯಿಲ್ಲದೆ ನಿಷ್ಠುರ ಭಾಷಣ ಕೊರೆದರು, ವಿಜ್ಞಾನದ ಬಗ್ಗೆ ತಲೆ ಕೆಡಿಸಿಕೊಂಡರು, ಪರಿಸರ ಹೋರಾಟಕ್ಕೆ ಧುಮುಕಿದರು ಕಡೆಗೆ ಚುನಾವಣೆಗೂ ನಿಂತು ಡಿಪಾಜಿಟ್ ಜಪ್ತು ಮಾಡಿಸಿಕೊಂಡರು! ಇಂತಿಪ್ಪ ಕಾರಂತರು ಬರೆದ ಸಾಹಿತ್ಯದಲ್ಲಿ ಒಬ್ಬ ಪ್ರಾಮಾಣಿಕ ಓದುಗನಾಗಿ ರಸದಷ್ಟು ಕಸವೂ ತುಂಬಿಕೊಂಡಿದೆ ಅನ್ನಿಸುತ್ತದೆ.

ಅವರ ಕೆಲವೆ ಕೆಲವು ಮೌಲಿಕ ಕೃತಿಗಳಲ್ಲಿ ಒಂದು "ಬೆಟ್ಟದ ಜೀವ". ಇದರಲ್ಲಿ ಅವರ ಅದ್ವಿತೀಯ ವ್ಯಂಗ್ಯ ಆದಷ್ಟು ಹಿಡಿತದಲ್ಲಿದ್ದು ಕೇವಲ ನೇರ ನಿರೂಪಣಾ ತಂತ್ರದ ಮೂಲಕ ಕಥೆ ಹೆಣೆಯಲಾಗಿದೆ. ತನ್ನ ಕಳೆದು ಹೋದ ದನವೊಂದನ್ನ ಹುಡುಕಿಕೊಂಡು ಕಾಟುಮೂಲೆಯೆಂಬ ದಕ್ಷಿಣ ಕನ್ನಡ ಜಿಲ್ಲೆಯ ದಕ್ಷ್ಣಿಣದ ತುದಿಯನ್ನ ಹೋಗಿ ಸೇರುವ ಶಿವರಾಮಯ್ಯ ಈ ಕಾದಂಬರಿಯ ನಾಯಕ. ಕಾಡಿನೊಳಗೆ ಊರು ಬಿಟ್ಟು ಹೋದ ಮಗನ ಮರು ಆಗಮನವನ್ನೆ ಕಾದು ಕುಳಿತ ವೃದ್ಧ ಗೋಪಾಲಯ್ಯ ಹಾಗೂ ಶಂಕರಮ್ಮ ದಂಪತಿಗಳ ಅನಿರೀಕ್ಷಿತ ಅತಿಥಿ ಇವರಾಗುವ ಪ್ರಮೇಯ ಒದಗಿ ಬರುತ್ತದೆ. ಈ ಆತಿಥ್ಯ ನಾನಾ ಕಾರಣದಿಂದ ಸುದೀರ್ಘವಾಗಿ ಪರಿಣಮಿಸಿ ಶಿವರಾಮಯ್ಯನವರಿಗೆ ಕಾಡಿನ ದುರ್ಗಮ ಪರಿಸರದ ನಡುವೆ ಒಂದು ಭರವಸೆಯ ಬದುಕು ಗೋಚರಿಸುತ್ತದೆ. ಪ್ರಕೃತಿ ಹಾಗೂ ಕಾಲ ಒಡ್ಡುವ ಅನೇಕ ಸವಾಲುಗಳನ್ನ ಸಮಚಿತ್ತದಿಂದಲೆ ಎದುರಿಸಿ ನಿಲ್ಲುವ ಜೀವನೋತ್ಸಾಹದ ಸೆಲೆಯೊಂದು ಕಾಣಿಸುತ್ತದೆ.

ಜ್ಞಾನಪೀಠದ ಗೌರವವನ್ನ ಪಡೆದಿರುವ ಕಾರಂತರು "ಬೆಟ್ಟದ ಜೀವ"ವನ್ನ ಕೇವಲ ಕಲ್ಪಿಸಿಕೊಂಡು ಬರೆದದ್ದಲ್ಲ. ಅವರ ಬರಹ ಬಾಳ್ವೆಯ ಅತ್ಯುತ್ತಮ ಕಾದಂಬರಿ ಇದು ಎನ್ನಲು ಅಡ್ಡಿ ಇಲ್ಲ. ಅಕಾಡಮಿ ಪ್ರಶಸ್ತಿಯನ್ನೂ ಗಳಿಸಿರುವ ಈ ಕಾದಂಬರಿ ವಾಸ್ತವದಲ್ಲಿ ಪುತ್ತೂರು ತಾಲೂಕಿನ ಕಡಬದ ಕಾಡಿನಂಚಿನ ಕಳಂಜಿ ಮಲೆಯ ದಟ್ಟ ಕಾಡಿನ ನಡುವೆ ಬದುಕು ಕಟ್ಟಿಕೊಂಡಿದ್ದ ದೇರಣ್ಣ ಗೌಡ ಹಾಗೂ ಗೋವಿಂದಯ್ಯರೆಂಬ ವಯೋ ವೃದ್ಧರ ಬದುಕಿನ ಸುರಮ್ಯ ನಿರೂಪಣೆ ಇದು. ಸ್ವಾತಂತ್ರ್ಯ ಪೂರ್ವ ಕಾಲದ ಸುಳ್ಯ ಹಾಗೂ ಪುತ್ತೂರಿನ ಪರಿಸರವನ್ನ, ಆ ಕಾಲದ ರೀತಿ ರಿವಾಜುಗಳನ್ನ ಅರಿಯಲು ಇದರ ಓದು ಸಹಕಾರಿ. ಇತ್ತೀಚೆಗೆ ಮೂರು ವರ್ಷಗಳ ಹಿಂದೆ ಪ್ರಶಸ್ತಿಗಾಗಿಯೆ ರೀಲು ಸುತ್ತುವ ನಿರ್ದೇಶಕರೊಬ್ಬರು ತಮ್ಮ ಮೂಗಿನ ನೇರಕ್ಕೆ ಈ ಕೃತಿಯನ್ನ ಅದೆ ಹೆಸರಿನಲ್ಲಿ ಸಿನೆಮಾವಾಗಿಸಿ ತೆರೆಗೆ ತಂದು ಒಂದೊಳ್ಳೆಯ ಅನುಭವವಾಗಬಹುದಾಗಿದ್ದ ಕಥೆಯನ್ನ ಕುಲಗೆಡೆಸಿದರು ಅನ್ನುವ ನೋವಿರುವವರು ಕೃತಿಯ ಓದಿನಲ್ಲಿ ಸುಖ ಕಾಣಬಹುದು. ಅಲ್ಲಿ ಓದುಗರ ಕಲ್ಪನೆಗೆ ಇನ್ಯಾರದೆ ನಿರ್ದೇಶನದ ಹಂಗು ಇರಲಾರದು!

ಪುಸ್ತಕದೊಳಗೆ - ೩

" ಉಲ್ಲಂಘನೆ"

ಲೇಖಕ; ಡಾ ನಾರಾಯಣ ಭಟ್ಟ ಮೊಗಸಾಲೆ,
ಪ್ರಕಾಶಕರು; ಸುಮುಖ,
ಪ್ರಕಟಣೆ; ೨೦೧೨,
ಕ್ರಯ; ರೂಪಾಯಿ ೪೦೦.

" ಸಾಂತೇರ್'ಗುತ್ತಿನ ಹೆಣ್ಮಕ್ಕಳು ಯಾವತ್ತೂ ಸುಂದರಾಂಗಿಯರೇ, ಅವರ ನಡೆಯಲ್ಲಿ ನುಡಿಯಲ್ಲಿ, ಗುತ್ತಿನ ಛಾಪು ಇರುವಂತದ್ದೇ. ಅಂಗಸೌಷ್ಠವವೂ ಅಷ್ಟೇ. ತಿದ್ದಿ ತೀಡಿದ ಹಾಗಿರುವ ಹುಬ್ಬು, ಉರುಟಾಗಿರುವ ಮುಖ, ತುಸು ದೊಡ್ಡದೆ ಎನ್ನಬಹುದಾದ ಮೂಗು, ತೊಂಡೆ ತುಟಿ, ಸೊಂಟದ ತನಕ ಇಳಿಯುವ ಕೂದಲು, ಗೋಧಿನಾಗರ ಮೈಬಣ್ಣ, ಆಕರ್ಷಕ ಕಣ್ಣು, ಉದ್ದ ತೋಳು, ಎದ್ದು ತೋರುವ ಎದೆ, ಹದವಾದ ಸಿಂಹ ಸೊಂಟ! ಸಾಮಾನ್ಯವಾಗಿ ಗುತ್ತಿನ ಎಲ್ಲಾ ಹೆಣ್ಮಕ್ಕಳೂ ಹೀಗೆಯೇ.

ಹಿಂದೆ ಕೋಚ್'ಮೆನ್ ದೊರೆ ಒಪ್ಪಿ ಕೈ ಹಿಡಿದ ಅಂಬಕ್ಕೆಯ ಅಜ್ಜಿಯ ತಂಗಿ ಕೊರಪೊಲುಗೆ ಈ ಎಲ್ಲಾ ಲಕ್ಷಣಗಳಿದ್ದು ಫಕ್ಕನೆ ಎಂತಹ ಗಂಡಸೂ ಒಮ್ಮೆ ನಿಂತು ನೋಡುವಷ್ಟು ಆಕರ್ಷಕವಾಗಿದ್ದಳಂತೆ. ಗಂಡಸು ಏನು, ಹೆಂಗಸೂ ಸಹ ಆಕೆಯನ್ನು ನೋಡಿ ಕಣ್ಣು ಕೀಳದೆ ಇರುತ್ತಿದ್ದರಂತೆ ಎಂದು ಮೂಸಬ್ಬ ವರ್ಣಿಸುವಾಗ ಕೇಳುಗರಿಗೆ ಪ್ರತ್ಯಕ್ಷ ಆಕೆಯನ್ನು ಕಾಣುತ್ತಿದ್ದೇನೆ ಎಂಬ ಹಾಗೆ ಚಿತ್ರ ಕಣ್ಮುಂದೆ ಬಂದಿದ್ದರೆ ಅದರಲ್ಲಿ ಆಶ್ಚರ್ಯ ಪಡುವಂತದ್ದೇನೂ ಇಲ್ಲ.

- ಡಾ ನಾ ಮೊಗಸಾಲೆ.

ಕನ್ನಡದ ಸಮಕಾಲೀನ ಸಾಹಿತ್ಯ ಜಗತ್ತಿನಲ್ಲಿ ಡಾ ನಾ ಮೊಗಸಾಲೆ ಒಂದು ಪ್ರಮುಖ ಹೆಸರು. ರಾಜಧಾನಿಯ ಸಾಹಿತ್ಯಿಕ ರಾಜಕೀಯಗಳಿಂದ ದೂರವಾಗಿ ಕೇವಲ ಸಾಹಿತ್ಯಕ್ಕಾಗಿ ಸಾಹಿತಿಯಾಗಿರುವ ಅನೇಕ ವಿರಳ ಬರಹಗಾರರಲ್ಲಿ ಇವರೂ ಒಬ್ಬರು. ಉಡುಪಿ ಜಿಲ್ಲೆಯ ಕಾಂತಾವರ ಎನ್ನುವ ಪುಟ್ಟ ಹಳ್ಳಿಯಲ್ಲಿ ಎಡೆಬಿಡದ ಸಾಹಿತ್ಯ ಚಟುವಟಿಕೆಯಲ್ಲಿ ತಮ್ಮನ್ನ ತಾವು ತೊಡಗಿಸಿಕೊಂಡಿರುವ ಇವರು ಎರಡು ವರ್ಷದ ಕೆಳಗೆ ಬರೆದ ದೊಡ್ಡ ಕಾದಂಬರಿ "ಉಲ್ಲಂಘನೆ". ಕನ್ನಡ ನಾಡಿನ ಕರಾವಳಿಯ ಬಲಾಢ್ಯ ಬಂಟ ಜನಾಂಗದ ಬಗ್ಗೆ, ಅವರ ಗುತ್ತು ಗತ್ತು ಒಂದಾನೊಂದು ಕಾಲದಲ್ಲಿ ಮೆರೆದಿದ್ದನ್ನ - ಆಧುನಿಕತೆಯ ಹೊಡೆತಕ್ಕೆ ಸಿಕ್ಕಿದ ಅವುಗಳ ಊರ ಯಜಮಾನಿಕೆಯ ಹೊಳಪು ಕ್ರಮೇಣ ಕರಗಿದ್ದನ್ನ ಸಾಂತೇರ್'ಗುತ್ತು ಎನ್ನುವ ಮಂಗಳೂರಿನ ಬಗಲಿನಲ್ಲಿಯೆ ಇರಬಹುದಾದ ಕಾಲ್ಪನಿಕ ದೊಡ್ಡ ಮನೆಯೊಂದರ ಉತ್ಥಾನ ಹಾಗೂ ಅವಸಾನದ ಕಥೆಗಳಲ್ಲಿ ನಾಲ್ಕು ತಲೆಮಾರುಗಳ ಸುದೀರ್ಘ ಕಥನದಲ್ಲಿ ಅವರು ವಿವರಿಸುತ್ತಾರೆ.

ಹುಟ್ಟಿನಿಂದ ಬ್ರಾಹ್ಮಣರಾಗಿದ್ದರೂ ಮೊಗಸಾಲೆಯವರ ವಿವರಣೆಯಲ್ಲಿ ಕೃತಕತೆ ಕಾಣಲಾರದಷ್ಟು ಅವರು ಬಂಟರ ರೀತಿ ರಿವಾಜುಗಳನ್ನ, ಸಾಂಸ್ಕೃತಿಕ ಅನನ್ಯತೆಗಳನ್ನ ಸೂಕ್ಷ್ಮವಾಗಿ ಗಮನಿಸಿ ಅರಿತು ಬರೆದಿದ್ದಾರೆ. ಊರೊಂದರ ಅಭಿವೃದ್ಧಿಯ ದ್ಯೋತಕವಾಗಿದ್ದ ಗುತ್ತಿನ ಏಳ್ಗೆ ಹಾಗೂ ನಡೆ, ಅಳಿಯಕಟ್ಟಿನ ಕೌಟುಂಬಿಕ ಪದ್ದತಿಯ ಬಂಟರ ಮನೆಯ ಯಜಮಾನ ಸಹೋದರ ಮಾವನಾಗಿರುತ್ತಾನೆ. ಇಲ್ಲಿಯೂ ಎರಡನೆ ತಲೆಮಾರಿನ ಗುತ್ತಿನಾರ್ ಸಂಕಪ್ಪ ಹೆಗ್ಗಡೆಯವರು ಯಜಮಾನರಾದರೂ ಗತ್ತು ಮೆರೆಯದೆ ಋಷಿಯಂತೆ ಬಾಳಿದ ಸ್ವಾತಂತ್ರ್ಯ ಹೋರಾಟಗಾರ. ಆದರೆ ಹರಿಯುವ ನೀರಿನಲ್ಲಿ ಎಲ್ಲವೂ ತೇಲುವಂತೆ ಮುಂದಿನ ತಲೆಮಾರಿನ ಹುಡುಗರಲ್ಲಿ ಯಜಮಾನಿಕೆಯ ಗತ್ತಿನ ಅವರ ತಂಗಿ ಯಜಮಾನತಿ ಅಂಬಕ್ಕೆಯ ಮಕ್ಕಳ ಕಾಲವೂ ಬರುತ್ತದೆ. ಭೂ ಸುಧಾರಣೆ ಮಸೂದೆ ಗುತ್ತಿನ ಕೃಷಿಗೆ ಗ್ರಹಣ ಹಿಡಿಸಿದ್ದು, ಫಲಾನುಭವಿ ಆಳು ಮಕ್ಕಳು ತಮಗೆ ಮಂಜೂರಾದ ಗುತ್ತಿನ ತುಂಡು ಭೂಮಿಯನ್ನ ಮಲೆಯಾಳಿ ಮುರಕಲ್ಲು ಮಾರಾಟಗಾರರಿಗೆ ಮೂರು ಕಾಸಿಗೆ ಮಾರಿ ಬದುಕನ್ನ ಇನ್ನಷ್ಟು ಹಾಳುಗೆಡವಿಕೊಂಡದ್ದು, ಗುತ್ತಿನ ಗತ್ತಿನ ಶೆಟ್ಟರೆಲ್ಲ ಬೊಂಬಾಯಿ ಸೇರಿ ಅಲ್ಲಿನ ಹೊಸ ತಲೆಮಾರಿನ ಸೇಟುಗಳಾಗುವಷ್ಟು ಪ್ರಭಾವಿಗಳಾಗಿ ಬೆಳೆದದ್ದು, ಕಾಲನ ಹೊಡೆತಕ್ಕೆ ಸಿಕ್ಕಿ ಮರೆಯಾಗುವ ಅಂಚಿನಲ್ಲಿದ್ದ ಭೂತದ ಕೋಲ, ನಾಗ ತಂಬಿಲ, ಕೋಳಿ ಅಂಕ ಹಾಗೂ ಕಂಬಳದಂತಹ ಸಾಂಸ್ಕೃತಿಕ ಆಚರಣೆಗಳೆಲ್ಲ ಬೊಂಬಾಯಿ ದುಡ್ಡಿನ ಭರಾಟೆಯಲ್ಲಿ ಡೌಲಿನ ಆಚರಣೆಗಳಾಗಿ ಮರುಹುಟ್ಟು ಪಡೆದು ದುಡ್ಡಿದ್ದವರ ಸೊಕ್ಕಿನ ಸೂಚಕಗಳಾಗಿ ಬೆಳೆದದ್ದು ಹೀಗೆ ಜಿಲ್ಲೆಯ ಎಲ್ಲಾ ಸ್ಥಿತ್ಯಂತರಗಳು ಇಲ್ಲಿ ಸೂಕ್ಷ್ಮವಾಗಿ ದಾಖಲಾಗಿವೆ. ನಡುನಡುವೆ ಮೊಗಸಾಲೆಯವರು ಹೆಣೆದಿರುವ ಪಾಡ್ದನಗಳು, ಉಲ್ಲೇಖಿಸಿರುವ ಕೃಷಿ ಪದ್ದತಿಗಳು ಮತ್ತು ಬಂಟ ಆಹಾರ ಪದ್ದತಿಯ ಸವಿವರಣೆ ಸ್ಥಳಿಯ ಭಾಷೆ ಹಾಗೂ ಸಂಸ್ಕಾರಗಳ ಬಗ್ಗೆ ಅವರಿಗಿರುವ ಹಿಡಿತಕ್ಕೆ ಸಾಕ್ಷಿ.

ಉಲ್ಲಂಘನೆ ಒಂದು ಕೃತಿಯಾಗಿ ಈಗಾಗಲೆ ಕರ್ನಾಟಕ ಸಾಹಿತ್ಯ ಅಕಾಡಮಿ ಪ್ರಶಸ್ತಿಯ ಜೊತೆಜೊತೆಗೆ ಇನ್ನೂ ಮೂರು ಪ್ರತಿಷ್ಠಿತ ಸಾಹಿತ್ಯಿಕ ಪ್ರಶಸ್ತಿಗಳನ್ನ ತನ್ನ ಮುಡಿಗೆ ಏರಿಸಿಕೊಂಡಿದೆ. ಬಂಟ ಸಂಸ್ಕೃತಿಯ ಬಗ್ಗೆ ಈ ಕಾದಂಬರಿಯನ್ನ ಆಧರಿಸಿ ಎಂ ಫಿಲ್ ಕೂಡಾ ಮಾಡಲಾಗಿದೆ. ಕೃಷಿಕ, ಬರಹಗಾರ ಹಾಗೂ ಅನುವಾದಕ ಮಧುಸೂದನ ಪೆಜತ್ತಾಯರು "ಉಲ್ಲಂಘನೆ"ಯನ್ನ DEFIENCE ಎನ್ನುವ ಹೆಸರಿನಲ್ಲಿ ಆಂಗ್ಲಕ್ಕೂ ಅನುವಾದಿಸಿದ್ದು ಅದೀಗ ಅದು ಪ್ರಕಟಣೆಯ ಹಂತದಲ್ಲಿದೆ. ದಕ್ಷಿಣ ಕನ್ನಡದ ಪ್ರಮುಖ ಕಾಲಾಂತರದ ಬದಲಾವಣೆಯನ್ನ ಸಶಕ್ತವಾಗಿ ಅನುಭವಿಸಲು ಇಚ್ಛಿಸುವವರು "ಉಲ್ಲಂಘನೆ"ಯನ್ನ ಓದಬೇಕು.

ಪುಸ್ತಕದೊಳಗೆ - ೨

"ಒರು ದೇಶತ್ತಿಂಡೆ ಕಥಾ'

ಲೇಖಕ; ಎಸ್ ಕೆ ಪೊಟ್ಟಕ್ಕಾಟ್,
ಪ್ರಕಾಶಕರು; ಡಿ ಸಿ ಬುಕ್ಸ್,
ಪ್ರಕಟಣೆ; ೧೯೮೦,
ಕ್ರಯ; ರೂಪಾಯಿ ೩೮೦.

" ಶ್ರೀಧರನ ಅತಿರಾಣಿಪಾಡದಲ್ಲಿ ಬಹಳಷ್ಟು ಬದಲಾವಣೆಗಳಾಗಿದ್ದವು, ಆದರೆ ಮೂಲೆಯ ಕೊನೆ ತಿರುವಿನಲ್ಲಿದ್ದ ಕುರುಡ ಮೋಪನ ಹುಲ್ಲು ಹೊದೆಸಿದ ಗುಡಿಸಲ ಸ್ವರೂಪ ಮಾತ್ರ ಹೆಚ್ಚು ಕಡಿಮೆ ಹಾಗೆ ಇತ್ತು. ಶ್ರೀಧರ ದರೆಯ ಕೋಲುಗಳನ್ನ ಸರಿಸಿ ಅಂಗಳಕ್ಕೆ ಅಡಿ ಇಟ್ಟಾಗ ಎಲೆ ಅಡಿಕೆಯನ್ನ ಕುಟ್ಟಾಣಿಯಲ್ಲಿ ಕುಟ್ಟುತ್ತಿದ್ದ ಮೋಪನ ಕುರುಡನಾಗಿದ್ದರೂ ಕೇವಲ ಚುರುಕಾಗಿದ್ದ ಕಿವಿಯಲ್ಲಿ ಹೆಜ್ಜೆಯ ಸದ್ದನ್ನೆ ಆಲಿಸಿ "ಮೋಳೆ ಪುಂಡು ದನ ಮತ್ತೆ ಬೇಲಿ ಹಾರಿತು ಅಂತ ಕಾಣುತ್ತೆ, ಈ ಹಡಬೆ ಪಶುವನ್ನ ಸಾಕಿದವರಿಗೆ ಕಟ್ಟಿ ಹಾಕಲಿಕ್ಕೆ ಏನು ರೋಗ?" ಎನ್ನುತ್ತಾ ನಡೆಯಲಾಗದಿದ್ದರೂ ಕೂತಲ್ಲಿಯೆ ಕೋಲು ಬೀಸಿದ. ಮಾತುಮಾತಿಗೆ ತನ್ನ ಕರೆಯುವ ಅಜ್ಜನ ಉಪದ್ರ ತಾಳಲಾರದೆ ಅವನ ಕರೆಯನ್ನ ಕೇಳಲು ಮೊಮ್ಮಗಳು ಅಲ್ಲಿದ್ದಿರಲೆ ಇಲ್ಲ!"
- ಎಸ್ ಕೆ ಪೊಟ್ಟಕ್ಕಾಟ್

ಕನ್ನಡವೂ ಸೇರಿದಂತೆ ಭಾರತದ ಬಹುತೇಕ ಎಲ್ಲಾ ಪ್ರಮುಖ ಭಾಷೆಗಳ ಓದುಗರಿಗೆ ಸುಕುಮಾರನ್ ಕುಟ್ಟಿ ನಾಯರ್ ತಮ್ಮ ಪ್ರವಾಸ ಕಥನಗಳಿಗೋಸ್ಕರ ಹೆಚ್ಚು ಖ್ಯಾತರು,೧೯೬೬ರಲ್ಲಿ ಅವರ "ಒರು ತೀರತ್ತಿಂಟೆ ಕಥಾ" ಪ್ರಕಟವಾಗಿತ್ತು. ಅನಂತರದ ಅನೇಕ ಅವರ ಕೃತಿಗಳು ಭಾರತದಾಚೆಯೂ ಯುರೋಪಿಯನ್ ಭಾಷೆಗಳಿಗೆ ಭಾಷಾಂತರಿತಗೊಂಡಿವೆ. "ಒರು ದೇಶತ್ತಿಂಟೆ ಕಥಾ" ಅವರ ಒಟ್ಟು ಸಾಹಿತ್ಯಿಕ ಕೃಷಿಯಲ್ಲಿಯೆ ಉತ್ಕೃಷ್ಠವಾದ ಕೃತಿ. ಈ ಮೇರು ಕಾದಂಬರಿ ೧೯೮೦ರಲ್ಲಿ ಜ್ಞಾನಪೀಠ ಪ್ರಶಸ್ತಿಯ ಜೊತೆಗೆ ಕೇಂದ್ರ ಸಾಹಿತ್ಯ ಅಕಾಡಮಿಯ ಪ್ರಶಸ್ತಿಗೂ ಭಾಜನವಾಗಿತ್ತು.

ಪೊಟ್ಟೆಕಾಟ್ಟರ ಕಾದಂಬರಿಗಳು ಸಾಮಾನ್ಯವಾಗಿ ಅವರ ಜೀವನ ಕಥನದ ನಿರೂಪಣೆಗಳೆ ಆಗಿರುತ್ತಿದ್ದವು. ಒಂದು ಅವಧಿಗೆ ತಲಚ್ಚೆರಿ ಕ್ಷೇತ್ರದಿಂದ ಎಡಪಕ್ಷಗಳ ಪ್ರತಿನಿಧಿಯಾಗಿ ಲೋಕಸಭೆಯ ಸದಸ್ಯರಾಗಿದ್ದ ಅವರು ಈ ಕಾದಂಬರಿಯಲ್ಲಿ ಅದರ ಅನುಭಗಳನ್ನ ಹಾಗೂ ಸಂಸತ್ತಿನ ಸದಸ್ಯನೊಬ್ಬ ತನ್ನ ಹುಟ್ಟೂರನ್ನ ಒಬ್ಬ ಸಾಮಾನ್ಯನಾಗಿ ಮರಳಿ ಬಂದು ಅವಲೋಕಿಸುವ ಧಾಟಿಯಲ್ಲಿ ನಿರೂಪಿಸಿದ್ದಾರೆ. ಶಾಲಾ ಮಾಸ್ತರರೊಬ್ಬರ ಎರಡನೆ ಸಂಸಾರದ ಕೊನೆಯ ಕೂಸು ಶ್ರೀಧರ ತನ್ನ ಕಣ್ಣಲ್ಲಿ ಕಾಣುವ ಹುಟ್ಟೂರು ಅತಿರಾಣಿಪಾಡದ ಕಳೆದ ಶತಮಾನದ ಅನೇಕ ಭೀಕರ ಸತ್ಯಗಳನ್ನ ಕಾದಂಬರಿ ಎಳೆ ಎಳೆಯಾಗಿ ಬಿಡಿಸಿಡುತ್ತದೆ.

ಸಮರಸ್ಯದ ಊರಿನಲ್ಲಿ ಒಮ್ಮಿಂದೊಮ್ಮೆಗೆ ಖಿಲಾಫತ್ ಹೆಂಡದ ಅಮಲೇರಿಸಿಕೊಂಡ ಮಾಪಿಳ್ಳೆಗಳ ಪುಂಡಾಟಿಕೆ. ಹಾಡಹಗಲೆ ಬಲವಂತದ ಮತಾಂತರದ ಪೈಶಾಚಿಕತೆ. ಆ ಕಾಲದಲ್ಲಿಯೆ ಮಲಬಾರಿನಾದ್ಯಂತ ೧೯೨೦ರ ಸುಮಾರಿಗೆ ಮುಸ್ಲಿಂ ಮೂಲಭೂತವಾದಿ ಮನಸ್ಸುಗಳು "ಬ್ರಿಟಿಷರು ಸೋತರು ಮೊದಲನೆ ಮಹಾಯುದ್ಧದಲ್ಲಿ ತುರ್ಕಿ ಗೆದ್ದಿತು ಇನ್ನು ಎಲ್ಲೆಡೆ ಅಲ್ಲಾನ ರಾಜ್ಯ" ಎನ್ನುವ ಗಾಳಿಸುದ್ದಿಗೆ ಕಿವಿಗೊಟ್ಟು ಸ್ಥಳಿಯ ನಾಯರ್ ಹಾಗೂ ನಂಬೂದರಿಗಳನ್ನೆ ಗುರಿಯಾಗಿಸಿ ನಡೆಸಿದ ಸಾಮೂಹಿಕ ಬಲವಂತದ ಮತಾಂತರ, ಅದರ ಭೀಭತ್ಸತೆಗೆ ಹೆದರಿದ ಬ್ರಿಟಿಷರು ಅದರ ನಿಯಂತ್ರಣಕ್ಕೆ ಅಂತಲೆ ಹುಟ್ಟು ಹಾಕಿದ ಅಷ್ಟೆ ಪೈಶಾಚಿಕ ನಡೆಯ "ಮಲಾಬಾರ್ ಪೊಲೀಸ್" ( ಈಗಲೂ ಇದೆ.) ಎಂಬ ವಿಶೇಷ ಅರಕ್ಷಕ ಪಡೆ. ಇಂದು ಆ ಮತೀಯ ದುರುಳತೆಯ ದೆಸೆಯಿಂದಲೆ ಮಲಬಾರ್ ಮುಸ್ಲಿಂ ಬಾಹುಳ್ಯ ಹೊಂದುವಂತಾಗಿದ್ದು. ಈಗಿನ ಮುಸ್ಲಿಂಮರ ಎರಡು ಪೀಳಿಗೆ ಹಿಂದಿನ ಧರ್ಮ ಹಿಂದೂವಾಗಿದ್ದದ್ದು ಎಲ್ಲವೂ ನಿರ್ಲಿಪ್ತವಾಗಿ ನಿರೂಪಣೆ ಹೊಂದಿದೆ. ಇನ್ನು ಗುಪ್ತನಿಧಿಯ ಆಸೆಗೆ ತರವಾಡು ಮನೆಯ ತಳಪಾಯವನ್ನೆ ಅಗೆದು ನಿಧಿಯ ರಕ್ಷಕ ನಾಗನ ಹೊಡೆತಕ್ಕೆ ಸಿಕ್ಕು ಸಾಯುವ ಕುಂಟ ನಾಯರನ ಕಥೆ ಮುಂದೆ "ಮಣಿಚಿತ್ರ ತಾಳ್" ಎನ್ನುವ ಚಿತ್ರಕ್ಕೂ ಸ್ಪೂರ್ತಿ ಆಗಿತ್ತು ಅನ್ನೋದು ನನ್ನ ಗುಮಾನಿ. ಅದೆ ಚಿತ್ರ "ಆಪ್ತಮಿತ್ರ"ನಾಗಿ ಕನ್ನಡಕ್ಕೂ, "ಚಂದ್ರಮುಖಿ"ಯಾಗಿ ತಮಿಳಿಗೂ, "ನಾಗವಲ್ಲಿ"ಯಾಗಿ ತೆಲುಗಿಗೂ ಹಾಗೂ "ಭೂಲ್ ಬುಲಯ್ಯ"ವಾಗಿ ಹಿಂದಿಗೂ ಸಾಗಿ ಗಲ್ಲಾಪೆಟ್ಟಿಗೆಯನ್ನ ದೋಚಿದ್ದನ್ನ ಇಲ್ಲಿ ನೆನಪಿಸಿಕೊಳ್ಳಬಹುದು.

ಒಬ್ಬ ಓದುಗನಾಗಿ ಮೊದಲು ಅನುವಾದವನ್ನೂ ಅನಂತರ ಅದರ ಮೂಲ ಕೃತಿಯನ್ನೂ ಓದುವ ಭಾಗ್ಯ ನನ್ನದಾಗಿತ್ತು. ಇದೆ ಕಾದಂಬರಿಯ ಕನ್ನಡ ಅನುವಾದವನ್ನ ಅಶೋಕಕುಮಾರ್ ಹಾಗೂ ಕೆ ಕೆ ನಾಯರ್ ಕನ್ನಡಕ್ಕೆ ಅನುವಾದಿಸಿದ್ದರೆ. ನ್ಯಾಷನಲ್ ಬುಕ್ ಟ್ರಸ್ಟ್ ಅದನ್ನು ಪ್ರಕಟಿಸಿದೆ. ಮೂಲ ಮಲಯಾಳಂನಷ್ಟು ನವಿರಾಗಿರದಿದ್ದರೂ ಅನುವಾದವೂ ಆಸಕ್ತಿಕರ ಓದಿಗೆ ಅಡ್ಡಿಯಿಲ್ಲದ ಕಾದಂಬರಿ.

ಪುಸ್ತಕದೊಳಗೆ - ೧

"ನಟಿ ಶಕೀಲ ಆತ್ಮಕಥೆ"

ಅನುವಾದಕ; ಕೆ ಕೆ ಗಂಗಾಧರನ್,
ಪ್ರಕಾಶಕರು; ಸೀಮಾ ಬುಕ್ಸ್, ಬೆಂಗಳೂರು.
ಪ್ರಕಟಣೆ; 2014
ಕ್ರಯ; ರೂಪಾಯಿ 200.

" ಈ ಪುಸ್ತಕದಲ್ಲಿ ನನ್ನ ಬದುಕಿದೆ. ಅನುಭವಿಸಿದ ನೋವು ನಲಿವುಗಳಿವೆ. ನನ್ನ ಜೀವನದ ಕುರಿತು ನಾನಲ್ಲದೆ ಬೇರೆಯವರು ಹೇಳಲು ಸಾಧ್ಯವಿಲ್ಲ. ಎಲ್ಲವನ್ನೂ ಪ್ರಾಮಾಣಿಕವಾಗಿ ಹೇಳಲು ಪ್ರಯತ್ನಿಸಿದ್ದೇನೆ"
- ಶಕೀಲ
( ಪುಸ್ತಕದ ಮುನ್ನುಡಿಯಲ್ಲಿ.)

"ಆತ್ಮ ಇರುವವರು ಸಾಮಾನ್ಯವಾಗಿ ಆತ್ಮ ಕಥೆ ಬರೆಯುವುದಿಲ್ಲ, ತಮ್ಮ ಆತ್ಮಕಥೆಯ ಹೆಸರಿನಲ್ಲಿ ಬಹುತೇಕರು ಬರೆಯೋದು ಇನ್ನೊಬ್ಬರ ಕಥೆ ಹಾಗೂ ಮಾಡಿಕೊಳ್ಳುವುದು ಆತ್ಮ ವಂಚನೆ" ಅನ್ನೋದು ಆತ್ಮ ಕಥೆಗಳ ಹೆಸರಿನಲ್ಲಿ ಪ್ರಕಟವಾಗುವ ಅನೇಕ ಕಗ್ಗಗಳ ಕುರಿತ ನನ್ನ ಅನಿಸಿಕೆ.

ಇಲ್ಲಿಯವರೆಗೆ ಓದಿದ ಅನೇಕ ಆತ್ಮ ಕಥೆಗಳು ಇದನ್ನ ಇನ್ನಷ್ಟು ದೃಢ ಪಡಿಸಿವೆ. ಆದರೆ ಪ್ರಾಮಾಣಿಕತೆಯ ಸರಳ ನಿರೂಪರಣೆಯ ಕೆಲವೇ ಕೆಲವು ಪುಸ್ತಕಗಳಲ್ಲಿ ಒಂದು So called ಸೆಕ್ಸ್ ಬಾಂಬ್ ಶಕೀಲರ ಆತ್ಮಕಥೆ.

ಮೂಲ ಮಲಯಾಳಂ ಭಾಷೆಯಲ್ಲಿ ಹರಿದಾಸ್ ನಿರೂಪಿಸಿ ಪ್ರಕಟಿಸಿದ್ದ ಈ ಪುಸ್ತಕವನ್ನ ಖ್ಯಾತ ಅನುವಾದಕ ಕೆ ಕೆ ಗಂಗಾಧರನ್ ಕನ್ನಡಕ್ಕೆ ಅನುವಾದಿಸಿದ್ದಾರೆ. ಮೈ ಒಳಗಿನ ಮನಸನ್ನೂ ಕಾಣುವ ಆಸಕ್ತಿ ಇರುವವರಿಗೆ ಇದು ಒಳ್ಳೆಯ ಓದು.